sponsor

समाचार

वैदेशिक समाचार

विशेष

गतिविधि

सेराेफेराे

» » » » बनाइ नसक्दै भत्कियो सडकको नाली र पर्खाल


खोटाङ, ४ कातिक । कालोपत्रेको काम थालिएको दिक्तेल–हलेसी सडक खण्डको अर्खौले क्षेत्रमा निर्माण गरिएको नाली र पर्खाल बनाइ नसक्दै भत्किएको छ । सडकमा पस्ने भलबाढी कटाउन आसपासमा निर्माण गरिएको नाली तथा सडक मुनीबाट उठाइएको पर्खाल बनाइ नसक्दै भत्किएको हो ।
निर्माणको जिम्मा लिएका ठेकेदार कम्पनीको लापरबाहीले निर्माणाधीन सडकको नाली र पर्खाल बनाइ नसक्दै भत्किएको स्थानीय किशोर श्रेष्ठले बताउनुभयो । “नालीमा प्रयोग गरिएका सिमेन्ट र बालुवाको मात्रा मिलाइएको थिएन ।” नेकपा एमाले खोटाङका जिल्ला सदस्य समेत रहनुभएका श्रेष्ठले भन्नुभयो, “यस प्रति समयमै सम्बन्धित निकायको ध्यान गएको भए यस्तो हुँदैन थियो ।”
नाली र पर्खाल निर्माणमा प्रयोग गरिएको सिमेन्ट र बालुवाको मात्रा नमिलेकै कारण बनाइ नसक्दै भत्किएको निर्माण गर्नमा सहभागी कामदारले स्वीकारेका छन् । “हामीले मात्रा मिल्दैन भनेकै हो ।” नाम नभन्ने सर्तमा एक कामदारले भने, “ज्यालादारीमा काम गर्न गर्ने कामदार न परियो, ठेकेदारले अह्राएको काम गर्दा यस्तै भयो ।”
आयोजनास्थलमा खटिनुभएका इन्जिनियर प्रकाश चौधरीले भने सडकमा निर्माणाधीन नाली तथा गाह्रो भत्किनुका कारण लगातारको वर्षा भएको दाबी गर्नुभयो । मध्यपहाडी लोकमार्गमा पर्ने ४२ किलोमिटर सडकमध्ये हलेसीदेखि अर्खौलेसम्मको १२ किलोमिटर सडक कालोपत्रेको जिम्मा सूर्य कन्ट्रक्सनले लिएको हो । 
जिल्लामा निर्माणाधीन भौतिक पूर्वाधारका विषयमा स्थानीय प्रशासनले समेत चासो नदिएको स्थानीयले बताएका छन् । दुई वर्षभित्र सम्पन्न गर्नेगरि निर्माणको जिम्मा लिएको उक्त सडक ठेकेदार कम्पनीको लापरवाहीले तीन वर्ष पूरा हुँदा समेत सम्पन्न भएको छैन । 
एसियाली विकास बैंकको आर्थिक सहयोगमा कालोपत्रेको काम थालिएको सडक हाल फराकिलो पार्ने बाहेक केही भएको छैन । वर्षा याममा समेत सवारी साधन सञ्चालन हुँदै आएको उक्त सडकमा अहिले फराकिलो पार्ने क्रममा सडकमा झरेको आलो माटोका कारण यातायात अवरुद्ध छ । 
जिल्लाका अन्य विकासे योजनामा समेत खबरदारी गर्न आवश्यक रहेको नेकपा माओवादी केन्द्र खोटाङकी सचिव दुर्गाजयन्ती राईले बताउनुभयो । “जिल्लामा भइरहेको विकास निर्माणका योजना जिल्लावासीकै हो ।” पूर्व सभाषद् समेत रहनुभएकी राईले भन्नुभयो, “यस प्रति हामी सबैले खबरदारी गर्नुपर्छ ।”
जिल्लामा निर्माणाधिन सडक मात्र नभइ सबैजसो विकासे योनजनामा ठेकेदारले लापरवाही गर्ने गरेको पाइएको छ । केही वर्षअघि निर्माण सम्पन्न भएको जिल्ला विकास समितिको भवनसमेत कम गुणस्तरीय रहेको छ ।

यसमा तपाईको प्रतिक्रिया

«
Next
Newer Post
»
Previous
Older Post